Молитва
О, многострадальная и премудрая мученице Христова Параскево! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся: Ты паче всех благ земных Сладчайшаго Господа Иисуса Христа возлюбила еси и Тому чрез все житие твое ревностно последовала еси, Божественною благодатию душу твою питающи. Испроси и нам у Милосерднаго Бога благодать, просвещающую и укрепляющую нас, да ею осеняеми, в вере и благочестии, в подвизех целомудрия и любви преуспевати будем и Христу чрез ближних наших служити неленостно потщимся. Моли Спаса нашего да сподобит и нас странствие наше земное непреткновенно совершити, в мире и покаянии житие наше скончати, да тако на земли поживше, вечныя и блаженныя жизни на небеси сподобимся и тамо со всеми святыми вкупе восхвалим Троицу Единосущную и Нераздельную, и воспоем Едино Божество, Отца и Сына и Святаго Духа во веки веков. Аминь.
